Sarlovhani ko'rib barchangiz hayron qolgandirsiz? Albatta bunday sarlovhadan
barchaning hayron qolishi tabiiy bir holat bo'lsa kerak. Arsenal barchamizning
sevimli jamoamiz. Bo'lmasa bu saytda bizga nima bor?! Yoki siz Chelsi, Manchester
Yunayted, yoki ana boring-ki Real Madrid, Barselona muxlislarini ko'rdingizmi saytda?!
Menimcha bu savolga har biringiz albatta yo'q deb javob berasiz. To'g'ri Arsenaldan
tashqari yana biror bir jamoaga muxlislik qiladigan do'stlarimiz ham yo'q 
emas oramizda. Mendan so'rasangiz men ham shu do'stlarimiz orasidaman.
Endi muddaoga o'tsak. Nega bu sarlovhani tanladim. Bilasizlarmi Arsenal
g'alaba qozongan o'yinlarda, hatto o'sha biz juda ko'p tanqid qiladigan Mertasaker,
Flamini, Remzi, O'zillar ham zo'rdek ko'rinib ketishadi ko'zimizga. Nega buni
hammani nomidan aytmoqdasan dersiz, lekin ayni haqiqat ekanligini o'zingiz
ham yaxshi bilsangiz kerak. Arsenal yutqazib qo'ysa yoki g'alaba qozonsa-yu 
o'yin yaxshi chiqmasa, har bir futbolchini yomonlashga tushamiz. Kamina ham shu
toifadan hisoblanaman. Yomonlash ham kerak-da har doim maqtayvermaymiz-ku to'g'rimi?!
Futbol muxlisi borki, o'zining sevimli jamoasining o'yinchilarini tanqid qiladi.
Biz ham ayni paytda futbol muxlisi, keyin Arsenal muxlisimiz. Shuning uchun tanqid ham
qilamiz, kerak bo'lmasa ham yomon so'zlar bilan ularni ta'riflaymiz. Bechoralar esa
bundan habarsiz keyingi baxsga tayyorlanishadi. Ular qayerdan ham bilishsin O'zbekistonda
Arsenal muxlislari bor ekanligini?! O'yinda "kattasini" tushirib qo'yib, "tirjayvolib" 
mashg'ulot o'tkazishadi. Ey Flamini yoki Mertasaker senga tirjayishni kim qo'yibti,
mashg'ulotda qattiq harakat qilib "o'pitingni" oshirsangchi degan muxlis topilarmikin
Londonda. Biz esa har doim saytdan turvolib shunday deb "klaviaturani" bosishdan charchamaymiz.
Yodimda 2011-yil uff.uz saytida bir Arsenal muxlisi bo'lar edi. Hozir bormi yo'qmi 
bilmayman. Balki "maska" bilan kirayotgandir. Shu muxlis Abu Diabi degan futbolchini
Arsenalning eng zo'r futbolchisi deb aytib hammani hayron qoldirib yurar edi.
O'sha "mashxur" Nyukasl bilan o'yindan keyin esa Diabini shu qadar "shirin" so'zlar
bilan ta'rifladi-ki, huddi u avval hech qachon Diabini maqtamagandek edi go'yo. 
Keyin men ham o'ylab ko'rsam Arsenaldagi qaysi o'yinchi bo'lishidan qat'iy nazar
u o'yinda yomon harakat qildimi, uni eng kamida "shirin" so'zlar bilan siylardim.
Hatto ular Anri-yu, Pireslar bo'lsa ham.