Bosh sahifa » 2016 » Dekabr » 17 » Абонементга навбат – 12 йил!

---

19:17 Абонементга навбат – 12 йил!

Москвадаги RMA бизнес мактаби талабаларига маъруза ўқиш мақсадида бу гал «Арсенал» клубининг тараққиёт ва ҳамкорлик департаменти раҳбари Адриан Перацини ташриф буюрди. Лондон жамоасида атиги ярим йилдан буён ишлаётган бўлсада, унинг вужудидан «тўпчилар» фалсафаси уфуриб туради. Перацини фаолиятини 13 йил муқаддам Италияда - «Аталанта»нинг маркетинг бўйича менежери сифатида бошлаганди. Сўнгра ишини «Лацио»да давом эттирди. «Арсенал»га ўтиш олдидан эса МБАнинг Лондон бўлимидаги юқори лавозимлардан бирида иш олиб борди, кейинги бир йилни маркетинг оламининг йирик вакилларидан бири бўлган IMG компаниясида вице-президент лавозимида ўтказди. - Россия сафарига отланар эканман, «Арсенал»нинг юртимиздаги мавқеи билан қизиқдим, - дея суҳбатга киришди Перацини. - Очиғи, натижа мени ҳайратга солди: «МЮ» ва «Челси»дек жамоаларнинг мухлислари жуда кўп бўлган мамлакатда «Арсенал» иштирокидаги учрашувлар трансляцияси кўп томошабинлар аудиториясини тўплаган. Бунга ишониш қийин, лекин бу - факт. «Арсенал» - оламшумул бренд. Биз Facebookда 37 млн., «Твиттер»да 8 млн. нафар мижозга эгамиз. Клубнинг расмий сайтига ҳар ой 4 млн. мухлис мурожаат қилади. Шундай улкан эътиборга муносиб бўлмоғимиз шарт. Бор кучимиз, имкониятларимиз айни мақсадга йўналтирилган. Ижтимоий тармоқлар орқали махсус акциялар уюштирамиз, жумладан, ҳамкор компаниялар иштирокида. Халқаро турнирлар уюштириш, клуб афсоналари иштирокидаги тадбирлар ҳам бизнинг зиммамизда. Масалан, Робер Пирес мураббийлар штабига ўтишдан аввал Ҳиндистоннинг «Гоа» клубида тўп сурди. У ердагилар Роберни яхши билганлари боис, Мумбайдаги тадбир ўта муваффақиятли ўтди. Рumа ҳамкорлигида ҳиндистонлик мухлислар билан дастлабки расмий учрашувни ташкиллаб, «Тоттенхэм»га қарши дерби баҳсини улкан экранда намойиш этдик. Бу ишқибозлар ҳеч қачон Лондонда бўлишмаган, балки умуман келишмас. Лекин улар «Арсенал»нинг чинакам мухлислари. Бу - жуда ажойиб! Нванкво Кану эса Африкада «тўпчилар»ни барчага танитмоқда. Июль ойида Австралияга сафар уюштиришни режалаштирганмиз, чипталар эса аллақачон сотиб бўлинган. Жамоа улкан мухлислар аудиториясига эга. 1,5 млн.дан кўпроқ мухлис «Арсенал»нинг «рақамли фан-клуби»га аъзо бўлишган. 250000 нафар фуқаро фан-клубнинг тўлақонли аъзолари ҳисобланишади. Улар орсидаги энг бахтли ва омадлилари йиллик абонементларга эга бўлишади. Яъни, аъзоликнинг «олтин» даражаси 37000 мухлисга, «кумуш» даражаси (қуйи ярусларга чипта олиш имконияти) 30000, «қизил» даражаси 124000 мухлисга насиб этди. Яна чақалоқдан тортиб, 16 ёшли ўсмирлардан ташкил топган 36000 мухлис учун ҳам алоҳида имтиёзлар белгиланган: абонемент соҳибига айланиш учун ишқибозлар ўртача 12 йил навбатда туришади. Умуман олганда, стадион бизнинг энг катта бойлигимиз. Табиийки, 60000 кишига мўлжалланган иншоот барча томошабинларни ўз бағрига сиғдира олмайди. Шу сабабли абонемент олиш учун 20000дан кўпроқ мухлис доимо навбатда туришади. Албатта, «Хайбери»дан «Эмирейтс»га кўчиб ўтиш бизга ҳам, мухлисларга ҳам осон бўлмади. Бу давр тақозоси - узлуксиз тараққиёт туфайли бунёд этилган арена «Арсенал»га доимий юксак савияни ҳадя этди. Бизнес бобида ҳам, майдондаги натижалар борасида ҳам жамоа етакчилар қаторида бормоқда. Биз ҳеч қачон қўлга киритилган ютуқлар билан чекланиб қолмаймиз. «Эмирейтс» доимо Англиянинг энг яхши стадиони бўлиб қолиши керак. Шу сабабли ҳар йили юксак мақомни бой бериб қўймаслик, талабларга жавоб бериш мақсадида 2-3,5 млн. фунт сарфланади. Албатта, шунга яраша даромад ҳам олинади. 2014|2015 йиллар мавсуми якунига кўра, «Арсенал» уй учрашувларида пул ишлаш борасида Европанинг барча жамоаларидан ўзиб кетди. Унинг даромади 132 млн. еврога етди. Бу кўрсаткич «Реал»да 130, «Барселона»да 117, «МЮ»да 114 млн.ни ташкил этган. Агарда «Хайбери» билан таққослайдиган бўлсак, «Эмирейтс»даги ўсиш яққол намоён бўлади. Даромад дастлабки мавсумдаёқ 44 млн.дан 91 млн.га кўтарилганди. Бироқ биз бу йўналишда имкониятлардан тўлиқ фойдаланиб бўлдик. Атрибутика савдосини янада кенгайтиришнинг иложи йўқ. Телеҳуқуқлар борасида ҳам вазият шундай. Бу масалалар кўп жиҳатдан клубга боғлиқ эмас. Тўғри, майдонда қайд этиладиган натижаларни ҳисобга олмаганда, албатта. Айтганча, АПЛнинг мавқеи шунчалик шиддат билан ўсиб бормоқда-ки, бундан 10 йил аввал клуб ТВ ҳуқуқларидан 44 млн. фунт даромад олган бўлса, ҳозирда ушбу кўрсаткич 125 млн.га етди! Реклама ва ҳомийлар билан ҳамкорлик қилиш соҳаларидаги даромадни кўпайтиришимиз мумкин. Puma, Citroen, Europcar, Indesit ва бошқа бир қатор йирик компаниялар бизнинг мижозларимиз ҳисобланишади. Сўнгги 10 йил ичида «Арсенал»­нинг рекламадан оладиган тушуми икки баробардан кўпроққа ошди. 2014|2015 йиллар мавсумида 104 млн. фунтга етди. «Эмирейтс» билан имзоланган шартноманинг аҳамияти катта. Мана 12 йилдирки, стадион номини сотиш хусусидаги келишув амал қилмоқда. Компания логотипи 2019 йилга қадар футболчилар либосларини безаб туради. Арена номига эгалик қилиш шартномаси эса 2028 йилгача узайтирилди. Ҳамкорликнинг янгидан-янги қирралари кашф этилмоқда. Масалан, «Эмирейтс»да бунёд этилган ўта шинам махсус ложалар компаниянинг юқори мартабали меҳмонлари хизматида. Исталган пайт учрашувларга келиб, Арсен Венгер меҳмони бўлишади. Ўйинчилар эса БААдаги турли тадбирларда фаол иштирок этишади. Дубайдаги «Арсенал» болалар футбол мактаби 2009 йилдан буён фаолият юритмоқда. Дарвоқе, компания ҳаммаси бўлиб дунёнинг 200га яқин топ-клублари билан ҳамкорлик қилади. Ҳайронман, у ердагилар қандай қилиб барчасига улгуришади? - Айтишларича, «Арсенал» абонементларини қўлга киритиш учун мухлислар йиллаб навбатда туришар экан. Унда нега янги стадион фақат 60000 томошабинга мўлжалланган? - Нима, сиз «Арсенал» 80000 кишилик арена қуришни истамаган, деб ўйлайсизми? Йўқ, ундай эмас. Гап шундаки, иншоот аҳоли зич жойлашган ҳудудда қад ростлаган, уни кенгайтиришнинг иложи йўқ. Шаҳар маъмурияти бошидаёқ шундай шартни олдимизга қўйганди. Ҳозирда «Тоттенхэм» ҳам айни муаммо гирдобида. Тўғри, унинг янги стадионига 500 нафарга кўпроқ мухлис сиғади. Менимча, рақибларимиз ҳеч бўлмаса, шу масалада биздан ўзиб кетишни кўзлаганлар, шекилли (кулади). - Ўйин бўлмайдиган кунлари стадион қай тариқа даромад олади? - Бу борада ҳаммаси рисоладагидек. Лондонга ташриф буюрган меҳмонлар учун «Эмирейтс» бўйлаб саёҳатга чиқиш худди Букингем саройи билан танишиш каби қизиқарли тадбирга айланган. - Айтинг-чи, сиз «Арсенал» мухлисимисиз? - Йўқ. Россияда бу жиҳатга катта эътибор берилармиш. Бизда ундай эмас. «Арсенал» тизимида «МЮ», «Челси» ҳатто «Тоттенхэм» ихлосмандлари ҳам меҳнат қилишади. Биз учун профессионализм биринчи ўринда!

1 2 3 4 5 O'qildi: 612 | Kiritdi: Arsenal49 | Reyting: 0.0/0

Вarcha fikrlar: 1
Порядок вывода комментариев: По умолчанию Сначала новые Сначала старые 0Спам 1 Koselni • 20:53, 17-Dek-16 Ablah cho'ntagini o'ylaysanda soskala